martes, diciembre 18, 2007

C L

Se algunha vez a miña voz calara
recolle estes versos meu amor e proclama
que quixen e non puiden
que quixen e non puiden ser horizonte estrela rosa mar
revolución risa bolboreta
esperanza perdida no corazón de homes e mulleres
e perdida en brazos solidarios solitarios desafiando futuro

E sen embargo meu amor non puiden sen embargo
deixar os meus poemas berrando luz a cada paso
converterme en soño lóstrego paxaro
pero non puiden e quixen e non puiden
arrabuñar o teu silencio
e repartir o teu silencio
e instalar o teu silencio o teu sorriso entre tanta
e tanta palabra malgastada...
e non puiden meu amor ser nada máis que area
pero area túa
e verso teu
e gratitude mirando ollos que din tenrura
tempo que queda que nos queda que queda por vivir
por vivirnos

Meu amor
se algunha vez a miña voz calara
recolle estes versos e proclama
que quixen e puiden
que quixen e puiden
amarte meu amor
amarte meu amor
AMARTE.